Anibs

Kala mo siguro nalimutan ko kaya malungkot yung bati mo sa akin kaninang umaga, ang tagal mong kumibo nung tinapik kita, ni hindi ka man lang kumurap, nagintay pa ko ng ilang minuto bago masilayan yung karakas mo. Hindi mo alam kagabi ko pa naalala na anibersaryo natin ngayon, kaya lang nalimutan ko kaninang umaga pag gising ko tapos ngayon ko na lang uli naalala, atleast naalala ko uli, atleast hindi pa tapos ang araw, hindi pa huli ang lahat. Ayokong maging sentimental, di naman talaga ako sentimental na tao, di ko naman ginagawa yung ganito taun-taon, unang beses ko pa lang ngayon, lagi namang merong unang pagkakataon sa lahat di ba? Naisip ko lang gawin dahil ika-limang taon na natin, akalain mo, limang taon din tayong naglolokohan...  Matagal din ang limang taon kung iisipin mo, wala sa hinagap ko na tatagal tayo ng ganito, bagama't hindi maganda yung simula natin nung unang dalawang taon eh napagtyagaan naman natin ang isa't isa at ngayon nga eh maganda na ang takbo ng ating samahan, malaki talaga ang nagagawa ng mahabang panahon na pagsasama, mas naiintindihan natin kung ano talaga ang gusto nating gawin at patunguhan.

Aaminin ko napasama na ko sa iba at alam kong alam mo yun, meron kasing wala sa iyo na meron sa iba, alam mo naman na dito sa ginagalawan ko pwedeng magkaroon ng dalawa, tatlo o kahit ilan pa ang naisin, wala namang batas na nagbabawal, pero nakita mo naman sa iyo pa rin ako bumalik, hindi mo naman ako masisisi, alam mo naman yung mga pagkukulang mo, wala ka namang maitatanggi, ganun pa man hanga pa rin ako dahil habang tumatagal eh lalo kang bumubuti, pero hindi na mahalaga lahat ng yan, sapat na sigurong pruweba na andito pa rin ako, iba talaga pag nakasanayan na, tumatatak na sa isip kumbaga.

Wag mo na sanang itanong kung hanggang kelan, dahil gaya ng mga bagay bagay sa mundong ito, lahat walang kasiguraduhan, walang permanente, lahat naman lumilipas. Dumedepende rin naman ako sa kung hanggang kelan ka tatagal, lahat naman dun naka depende, yun lang din ang pinanghahawakan ko, wala namang ibang kakapitan pa bukod sa katotohanang yon. Sa ngayon ok na ko sa yo, pwede pa rin kitang tawaging chuva chu chu gaya ng gusto mo hangga't kelan mo naisin, wag lang sa harap ng madaming tao, dahil labis na mahiyain talaga ako, alam mo yan.

Muli sasabihin ko sa yo, hindi ko nalimutan ang anibersaryo natin, nawaglit lang panandalian sa isipan ko, sabihin na nating madaming trabaho sa opisina, pero nakita mo naman, imbes na umuwi na ako eh naguupdate pa ko sa yo, ganyan ka ka-lakas sa akin, me kailangan pa ba akong patunayan? Wala na siguro... muli hapi anibs sa yo multiply account... limang taon na rin yan... sana wag ka nang magtampo at sana bumilis ka nang mag load, wala namang problema yung connection namin malamang nagiinarte ka lang, pasensya na bukod kasi sa mahiyain eh mainipin din ako... o sya titigili ko muna to, hanggang dito na lang, baka akalain ng mga bumibisita dumodroga na ko.

Sya nga pala since wala man lang nagbigay ng glitter text nung birthday ko (gusto ko pa naman ng ganun) ikaw na lang bibigyan ko. Mwah.

Glitter Text Generator