Kiss and make-up

Hanga ako sa mga babaeng kayang mag make-up sa umaandar na sasakyan, pramis, yun ganung klaseng gawain eh maihahalintulad mo sa akrobatikong pagtatanghal na kaya lamang gampanan ng mga propesyunal, kaya di ko maiwasang humanga sa kanila. Kumbaga kung ipapasok sila sa trabaho, pwede silang mamasukan sa mga electronics company, mga semiconductor production ganun, yung kailangan ng good eye, hand and body coordination, maituturing silang highly skilled employees. Mahirap din yung mag eyeliner ng umuuga yung paligid mo, hawak nila sa kaliwang kamay yung salamin samantalang yung kanan naman eh dinudutdot yung gilid ng mata nila, tapos nakakabalanse pa sila ng katawan kapag pumepreno yung sasakyan. Mga ilang beses na rin akong nakakasakay ng babaeng nagma-make-up sa loob ng isang umaandar na sasakyan, kalimitan papasok sa opisina o kaya yung mga papasok sa department store, parang sanay naman silang tingnan o titigan ng ibang pasahero, o baka mas sanay ang mga pasahero na sa araw araw eh may nakikita silang nag kokolorete sa loob ng pampublikong sasakyan, alin lang sa dalawa yun.

 

 

Hindi ko alam pero malamang kakulangan din sa oras kaya marami ang napipilitang mag ayos ng karakas sa loob ng sasakyan, o baka nakagawian na lang, yung tipong hindi sila makakapag make-up pag hindi umuuga yung paligid nila, parang andun yung excitement ng pagma-make-up sa loob ng umaandar na sasakyan. Kumbaga sa pintor, sanay silang magpinta kahit nanginginig yung pasmado nilang kamay, challenge siguro sa sarili nila kung paano papagandahin yung sarili nila despite yung constant na pag uga ng sasakyan, at dun nga ako namamangha, dahil ni minsan wala akong nakitang nag make-up sa loob ng sasakyan na pangit ang kinalabasan, wala pa akong nakitang lumagpas na lipstick, natusok ang mata, hindi pumantay ang blush-on, wala pa naman akong nakikitang kakatawang kinalabasan ng pagmamake-up sa loob ng umaandar na pampublikong sasakyan.

 

 

Kailan lang nakatabi ko sa isang jeep yung isang babaeng mukhang papasok sa opisina at oo tama ang hula nyo nagmamake-up sya, pero medyo mas extreme ng konti, hindi naman dahil sa lumalambitin pa sya sa estribo ng jeep habang nagmamake-up, hindi ganung ka extreme wag kayong oa, mangyari kasi eh parang ginawa na nyang extension ng bahay nya yung jeep, pagkasakay pa lang nya eh naglabas agad ng tinapay at inumin at sa jeep na nag almusal, tapos dun na rin nagpalit ng sandals, at syempre ang pinakaimportante, ang make-up, pati na rin pag aayos ng buhok, partida punuan pa yung jeep ng mga oras na yun. Merong mga tao talaga na manhid na sa titig ng ibang tao, sanayan lang, siguro kailangan talaga, hindi naman natin talaga masabi dahil baka naman working mom sya at yung oras na iuukol nya dapat sa sarili nya eh binibigay na lang nya para pagsilbihan yung mga anak nya at ang kanyang asawang batugan, kaya napupwersa syang gawin yung mga pansarili nyang gawain sa mga di inaasahang lugar, gaya nga sa mga pampublikong sasakyan.

 

 

Hindi ko namamalayan at malamang kayo rin, na yung simpleng pagmemake-up pala sa loob ng sasakyan eh sumasalamin na pala sa patuloy nating paghahabol sa oras sa araw araw nating pamumuhay, pilit nating pinagkakasya lahat ng gawain natin sa bente kwatrong oras natin sa isang araw, yung buhay nga daw natin kinukumpara sa isang rat race, lahat tayo naghahabol, hindi dahil sa ito ang natural na takbo ng buhay kundi masyado nating binibigyan ng taning bawat gawain natin, bukod pa sa mga itinakdang oras ng mga kompanyang pinagtatrabahuhan natin, bawat segundo mahalaga, lahat ng gagawin dapat nakabase sa schedule, may oras para sa lahat, kaya nga me mga kataga gaya ng ‘so many things to do, so little time’ dahil merong mga tao talaga na kulang ang bente kwatrong oras para magawa ang mga bagay sa isang araw, alipin nga naman daw tayo ng oras na kung hindi mo masusundan at mahuhuli ka sa itinakdang oras, malamang makita rin kitang nagme-make-up sa loob ng pampublikong sasakyan kung babae ka, kung lalake ka at nagme-make-up ka sa loob ng sasakyan eh hindi ka lalake at dapat nandun ka sa harap ng Comelec at nagpoprotesta sa hindi pag-apruba sa kandidatura ng LADLAD bilang partylist.

 

Totoo hanga talaga ako sa mga babaeng kayang mag make-up sa loob ng pampublikong sasakyan, pero kung tutuusin wala yang sinabi at mas nahanga ako sa mga empleyadong kayang mag facebook habang nagtatrabaho, ibang kwento naman yan.