Ex

"Kanina ko pa hinihintay na ayain mo akong ihatid..." sabi nya sa akin habang bumabyahe kami pauwi sa kanila.

"Actually kanina pa kita hinihintay na magpahatid sa akin." sagot ko naman na medyo natatawa.

Totoo nakakatawa dahil naisip ko yung eksenang nauna eh parang naging isang metaphor sa relasyon namin nung naging kami nung highschool. Oo nagkita kami nung girlfriend ko nung highschool kelan lang, pero oks lang dahil friends na kami ngayon, gaya nung sinasagot ng mga artista sa showbiz, yan ang isa sa mga naidudulot ng mga reunion at gatherings tuwing holiday season, bukod sa nagkikita-kita kayong magkakaibigan eh nagkikita rin yung mga nagka-ibigan, hanep daig ko pa si Mark Logan kung gumawa ng rhyme. Pero ayos lang dahil taun-taon naman kaming nagkikita at casual naman yung pakikitungo namin sa isa't isa.

Pagdating sa kanila gaya ng dati tulog mantika ang mga tao kaya hindi madinig dinig yung katok nya sa gate, sa bagay alas-tres pasado na ng madaling araw yun kaya malamang nasa kalaliman ng tulog yung mga tao sa kanila, wag nyo nang itanong kung anong ginagawa namin sa ganung disoras ng umaga. Matapos ang ilang katok na walang lumalabas eh dating gawi uli at kailangan nyang akyatin yung bakod nila, sabi ko nga eh ako na ang aakyat, hindi naman sya pumayag at mabilis naman akong nag 'ok' sa kanya dahil ang totoo malululain ako kaya wala akong nagawa kundi panoorin syang umakyat ng bakod na naka high-heels, ang gentleman ko talaga, ivi-video ko pa sana syang umaakyat pero sasapakin daw nya ko kaya di ko na tinuloy. Magaling pa rin syang umakyat, akala mo di nadagdagan ng 30lbs ang katawan, kung makasampa sa bakod akala mo miyembro ng akyat bahay, at ayun nakapasok na rin sya at tinapos namin ang umaga sa isang torrid kiss beso-beso.

Malamang hindi nya rin na-realize yun, dahil gaya ko, nung oras lang na yun ko narealize na naging ganun nga yung relasyon namin, pareho kaming assuming lagi sa isa't isa, laging hindi sigurado, parang lagi namin iniisip yung iniisip ng isa sa amin, ganung kagulo pero ganun naman talaga siguro dahil bata pa kami, pero tuli na ko nun, highschool lang kaya immature kung immature, ni hindi nga kami nagbreak, walang break-up na nangyari, basta nawala na lang, nakakatawa lang talaga ngayon dahil parang wala kaming pinagkatandaan, ganun pa rin kami, para kaming mga matatandang nagpapa-cute. Pero atleast ngayon panatag na kami sa isa't isa pero hindi dahil Lactum ang iniinom naming gatas kundi dahil sa ngayon eh mas komportable na kami sa bawat isa at alam na naman namin na meron na kaming kani-kaniyang buhay at gaya ng sabi ng madami, past is past.

Pero sa naaalala ko mula nung regular kaming magkita taun-taon eh ni isang beses di pa namin nasubukang mag usap ng sarilinan, ewan ko kung dahil ba sa lagi naman kaming grupo kung lumabas at walang chance makapagusap o wala lang talaga kaming paguusapan... pero kung ako ang tatanungin gusto ko rin syang makausap, yung kaming dalawa lang, pero hindi naman para ibalik kung anuman yung nakaraan, simpleng kamustahan lang, simpleng kwentuhan, simple pero hindi ko naman magawa dahil mag katinginan nga lang kami eh naghihiyawan na ang tropa na para kaming Guy and Pip nung 60's, magusap pa ng sarilinan eh baka magkanda himatay na yung mga yon. Siguro next time gagawa kami ng paraan para makapagusap kami ng hindi nila nahahalata, parang charade -- two words? english? first word, 3 syllables...

Oo gusto ko syang makausap naman kahit paano, parang katulad dati, pero walang malisya pramis friends lang, wala naman sigurong masama dun... natatandaan pa kaya nya nung hinarana ko sya sa stage nung may school program kami dahil sinet-up kami ng mga teacher namin sa PEHM? o kaya nung na-weirduhan sya dun sa kantang tinutugtog ko sa gitara dahil hindi pa kilala ang eheads at wala pang airplay sa radio yung "Ligaya" natatandaan pa kaya nya yun? O kaya yung dumalaw ako sa kanila at inabot ako ng alas-9 ng gabi tapos nagpaparinig yung mommy nya na maglalatag na daw sila ng banig, kahit na alam ko naman na hindi sila naglalatag ng banig dahil me kama naman sila eh nagpaalam na ko dahil alam kong yun na ang hudyat para umalis na ko, natatandaan kaya nya yun? O kaya yung first kiss namin sa likod ng tangke ng tubig nila dahil hindi kami nakikita dun ng mommy nya dahil malaki yung tangke nila ng tubig, pero nasa bubungan pala yung kuya nya at inaayos yung antena ng tv buti na lang di kami nakita kundi patay ako, naaalala nya kaya yun? 

Malamang pag nagkausap kami maitatanong ko sa kanya yang mga yan at ilan pang mga istorya namin dati, malamang din ilan dyan di na nya matatandaan dahil alam ko me kahinaan yung memorya nya, at kung mababasa man nya to malamang matatawa lang yun, mapapaisip, kikiligin konti tapos bubulong sa sarili... sasabihin nya... "itong si rick talaga kahit kailan... sira ulo!"