Burdey!

Nag celebrate si ms Didith, ang aming bagong manager dito sa opisina, ng kanyang bday, syempre di sya  makakalusot sa gasgas na gasgas nang request na “Pa-cheese burger ka naman!” na nasapawan na yun dating “Pa-canton ka naman!” expression. Hindi ako madalas magtanong ng edad sa mga taong may birthday, lalo na pag alam kong lagpas na sa kalendaryo ang edad nila, sa halip tinatanong ko kung pang-ilang bday na nila yun, atleast mas nakakakuha ako ng mas honest na answer dahil hindi naman edad nila ang tinatanong ko, ang tinatanong ko kung pang ilang bday na nila yun.

 

“Pang-ilang bday mo na ms didith?” tanong ko.

“Pang 33 na.” sagot naman nya ng walang ka-gatul-gatol.

 

Minsan kasi pag tinanong mo yung isang celebrant kung ilang taon na sya eh madalas pakipot ang sagot like “secret!”, “hulaan mo?” o kaya sasagot ng alam mo namang malayo sa katotohanan, sasabihing 18 lang sila kahit parang rice terraces na yung noo sa dami ng kulubot, papalusot pa ng “matured lang talaga akong tingnan.” Pag pinoy kasi parang big deal yung edad.

 

Si Nelson, yung all around taga-sira sa opisina, twice syang mag celebrate ng bday nya, isang Nov 6 at isang June 13 daw. Nasunog daw kasi yung munisipyo sa Bicol kung saan sya nakaregister kaya hindi na nakita yung kopya nya ng birth certificate nya, yung kopya naman nya eh matagal na daw nawala, naipangbalot na daw ata ng tinapa. Sabi ng tatay nya Nov 6  sya pinanganak, pero sabi naman daw ng step mother nya eh June 13 daw ang birthday nya, pero ang alam nya October 12 sya pinanganak, na-over ata sa MSG yung mga magulang nya nung pinanganak sya kaya di matandaan, kaya kesa idaan pa nya sa Pulse Asia survey eh minabuti na nyang i-celebrate sa dalawang petsa ang birthday nya. At kung sakaling kakailanganin nyang mag fill-up ng forms eh kailangan lang nya ang tulong ng piso para sa ilalagay nyang date ng bday nya, Nov 6 kung head, June 13 kung tails, ganung ka simple.

 

Mahirap pag di mo alam ang birthday mo, parte kasi yun ng identity mo bilang tao. Buti na lang mabait si ms Didith at nag-offer syang tulungan si Nelson na malaman ang kanyang birthday, pero hindi naman yung tulong na iniisip ni Nelson na makikipag communicate si Ms Didith sa namatay nyang ina para malaman yung tunay na araw ng kanyang kapanganakan, not that kind of help, sa NSO lang. Sa pamamagitan ng Ecensus.com.ph at ang makapangyarihang P415.00 na bayad eh malalaman na ni Nelson ang kanyang tunay na birthday. So matapos magfill-up ng form online eh medyo magpapa-suspense pa ang Census dahil kailangan pa ng 3 regular working days para mai-deliver ang resulta.

 

Medyo excited kaming lahat sa opis na malaman ang katotohanan, ano kaya ang mangyayari kapag nalaman na ni Nelson ang tunay nyang bday? Magbabago kaya ang takbo ng buhay nya? Sisingilin kaya sya ng mga ninong nya dahil dalawang beses sya manghingi ng regalo dati? Kaya nya bang tanggapin ang kaakibat na katotohanang maaring tumanda sya o bumata base na rin sa resulta ng tunay na bday nya? Paano kung sa araw ng delivery ng resulta ng bday nya eh lumidol ng malakas? (knock on wood) Bubuti ba ang lagay ng ekonomiya ng bansa pag nalaman na nya ang bday nya? Magkakabalikan ba si Dingdong at Karylle pag nalaman na nya ang tunay na bday nya? Si Anne Curtis ba talaga ang ‘Takda’? Bakit ang daming ‘fangirls’ ng Twilight? Ang lahat ng yan at iba pang katanungan ay malalaman after three days. Sisihin nyo ang NSO sa mabagal nilang serbisyo.