Yung pagaaral minsan sagabal sa edukasyon

"Wag ninyong hayaang ang inyong pagaaral ay maging sagabal sa inyong edukasyon!"

Narinig ko yang kataga na yan nung college pa ko na kinakanta ni Chikoy Pura para dun sa stage play na Lean, tungkol dun sa istorya nung pinatay na aktibistang si Lean Alejandro.

Hindi naman tungkol sa kanya tong entry ko, tungkol lang sa edukasyon at pagaaral. Na-excite lang ako dahil first day ni Taz sa school kahapon, medyo excited din sya at maagang nagising, iyun na ang unang araw na babago sa buhay nya at huhubog sa kanyang kinabukasan, unang hakbang sa pag abot nya sa kanyang mga pangarap... naks. Syempre bilang magulang eh natutuwa kami na may halong kaba din, pero di naman ganung kabado dahil pinaghandaan naman namin ni wifey yung pagpasok ni Taz, alam kong kayang kaya ni Taz yun, sa tingin ko nga mas advance yung pag-iisip ni Taz kesa sa mga bata dun sa amin na kasing edad nya. Habang yung ibang magulang kasi eh hine-hele nila yung kanilang anak eh kami tinuturuan na namin si Taz ng mga simpleng aralin. Sa katunayan marunong na syang magbilang mula 1 to 100, pwede mo nga syang hingian ng number na itataya sa lotto. Saulado na rin nya yung alphabet, kaya nyang i-identify yung iba't ibang shapes mula circle, square, triangle, hanggang pentagon, octagon, trapezoid at osteoporozoid. Kaya din nyang i-identify ang primary, secondary at tertiary colors, at higit sa lahat kaya nyang palobohin yung sipon nya sa ilong, ganun na sya ka-advance... kaya naman hindi kami gaanong nagwo-worry ni wifey sa schooling nya. 

Ang iniisip lang naman namin kasi, hindi naman puro learning lang sa school, syempre me tinatawag ding socializing, iniisip din kasi namin yung mga makakasalamuha nya sa klase, medyo maharot kasi si Taz, kaya nga nyang magpaiyak ng grade 1 student, mahirap ding sawayin, kaya hindi kami nagwo-worry ke Taz kundi dun sa mga classmates nya, baka mapaaway pa kami ng di-oras, saka paano kung meron nang manligaw kaagad sa kanya tapos ayain syang magtanan, tapos mabuntis sya ng wala sa oras paano na yung kinabukasan nya... ang OA ko... kasing OA nung tuition fee nya, kailangan naming magluwal ng P15k++ para lang magpaaral ng nursery, parang binibili na namin yung school sa OA ng tuition. Isipin mo na lang pag tuntong nya ng college... baka mag hosto na lang ako sa Brunei para makaipon para sa college nya.

Ngayon sobrang naappreciate ko na yung hirap ng magulang ko para mapag-aral kaming tatlong magkakapatid, dahil ako na ngayon yung nasa kalagayan nila. Me pagsisisi nga ako dahil naalala ko nung grade 6 nakapag-cut class ako para manood lang ng "Predator 2" sa sine, nagsisisi ako kasi dapat pala yung "Child's Play 2" na lang ang pinanood namin para mas enjoy corny kasi yung Predetor 2. Pero first and last cutting class ko yun at di na naulit dahil nakakakonsensya din.

Kagabi nga napanood ko sa Korina yung tungkol sa isang nanay na nag tyagang magtinda ng dyaryo araw-araw para lang mapagtapos ang tatlong anak nya. At napagtapos naman nya at lahat ng anak nya ngayon eh pawang professionals na, yung isa engineer, yung isa naman teacher na, tapos yung isa hindi ko nadinig yung trabaho pero sabi professional naman daw, druglord ata parang ganun. Nung ininterview nga yung isang anak nya sabi eh hindi daw masusuklian o matatapatan ng kahit na gaanong kalaking halaga yung sakripisyo na ginawa ng kanilang ina, naluha ako sa puntong yun, kasi naghihiwa ako ng sibuyas para sa sisig pampulutan namin ni wifey nung mga oras na yun. 

Tama nga naman yung isang anak, me punto sya dun, wala ngang kapantay yung ginawa nung nanay nila para mapagaral sila pero parang ayoko lang dun sa notion na dapat tanawin na utang ng loob ng mga anak yung pagpapa-aral sa kanila ng kanilang mga magulang, dahil kung iisipin mo... try mo lang isipin, tungkulin naman ng mga magulang na bigyan ang kanilang anak ng disenteng edukasyon at karapatan ng bawat bata ang makapag-aral, yung edukasyon sa opinyon ko eh hindi naman yan isang wish na kailangan  hilingin ng mga anak sa kanilang mga magulang kundi isa itong pribelehiyong binibigay sa mga anak ng kanilang magulang, kung hindi matutugunan ng bawat magulang yun pagbibigay ng edukasyon sa kanilang mga anak edi sana hindi na lang sila naglampungan at nagkaanak para wala silang problemahin. Dapat nasa anak na lang yun kung nais nyang gantihan yung ginawa ng kanyang mga magulang pero hindi dapat gawin na parang utang na kailangang bayaran yung pagbibigay ng edukasyon, dito kasi sa atin ganun na yung kulturang nakagisnan.

Basta kami ni wifey pagtatapusin namin si Taz ng pagaaral, pagnakatapos na sya ng pagaaral bahala na sya kung ano na ang gusto nyang gawin sa buhay nya, di na kami makikialam, para naman sa kanya talaga yung ginagawa namin, para sa future nya. Sabi nga eh edukasyon ang pinaka magandang maipapamana ng magulang sa kanilang anak, sa ngayon ang tanging dasal ko lang naman sana ay magsipag sya sa pagaaral, sana ay magenjoy sya sa school,  at sana manalo ang Lakers versus Magic sa NBA finals. Amen.