Jesus > ctrl + S

Sa isang catholic TV show tuwing lingo ng umaga, meron silang segment kung saan maaring magtanong ang mga viewers ng kahit na ano patungkol sa ‘faith’ and ‘religion’ naabutan ko yung isang tanong tungkol sa pagsisimba tuwing linggo, naging interesante para sa kin dahil isa ako sa mga madalas umabsent tuwing lingo, nasabi ko na sa inyo dati na hindi pang El Shaddai yung personality ko. Kasalanan ba daw na maituturing yung hindi pagsisimba tuwing lingo? Ang sagot ng host na isang bishop eh isang nakakalungkot na ‘Oo’ kasalanan ang hindi pagsimba tuwing lingo, ayon sa doktrina ng simbahan. Aaminin ko ngayon ko lang nalaman yun.

Hindi naman ako palasimbang tao, pero madalas akong magpasalamat ke Bro sa araw-araw, kahit sa mga simpleng bagay na nangyayari sa buhay ko. Mas naniniwala kasi ako na mas mabuti pa yung magkaroon ka ng personal na relasyon sa Diyos o kung sino mang superior being yung sinasamba mo kesa sa ilimita mo ang sarili mong pananampalataya sa pag sisimba tuwing linggo. Me posibilidad na mali ako pero yun ang gusto kong paniwalaan.

Sabi sa simbahang katoliko “The Catholic Church teaches that the faithful are obligated to attend Holy Mass (Eucharistic celebration) on days of obligation. Those who deliberately fail in the obligation of attending Sunday Mass commit a grave sin.” Wow so grave sin nga ang hindi pag simba yun ay ayon sa simbahan mismo, andami palang nagkakasala sa simpleng hindi pagsimba, gayun pa man mas trip kong pakinggan yung sinabi ni Gary Granada na “Hindi natin kailangan ng mga katedral at moske, o obispo at kaparian, o denominasyon at mga sekta, o ritwal ng kasal, binyag at libing, para maging malapit sa Diyos. Magsimba tayo sa Simbahan ng pagkalinga, pagkakapantay-pantay, pakikipagkapwa, pagkilala sa sarili at pagpapakumbaba.” Mas makatotohanan, mas malapit sa lohika kung iisipin mong mabuti. Hindi naman sa simbahan nagsisimula yung unang baitang papuntang langit, kundi sa sarili mo mismo sa kung paano ka makitungo sa kapwa mo at sa lahat ng gawa ng Diyos ayon sa kanyang kagustuhan. Yung sticker na lang na nakadikit sa jeep, nakalagay “Jesus Saves” nakakita na ba kayo ng sticker na “Jesus only saves those who go to church every Sunday” bagaman sticker lang yun, kumakatawan na rin yun sa paniniwala nating mga tao na higit pang mas malawak ang pagmamahal at pangunawa ng Diyos sa LAHAT ng tao, kung ikukumpara mo sa mga tinuturo sa simbahan.

Naalala ko tuloy yung istorya ng dwelo nila Jesus at Satanas… Maikwento ko na rin sa inyo tutal na ungkat ko na yung tungkol sa sticker na “Jesus Saves”. Nagkaroon kasi ng dwelo si Satanas at si Jesus. Sa harap ng tig isang computer, hinamon kasi ni Satanas si Jesus na kung sino man sa kanila ang makakapag-tala ng pinakamaraming pangalan ng bawat tao sa mundo sa computer sa loob ng isang oras ay sya ang aangkin ng kaluluwa ng bawat taong naitala nya. Tinanggap ni Jesus ang hamon, at kaagaad silang nagsimula. Mabilis ang kamay ni Satanas sa pagttype samantalang kalmado naman si Jesus at maya’t maya ay tumitigil sya sa di malamang dahilan, pero si Satanas ay patuloy pa rin ang pag tiklada sa keyboard ng dire-diretso at walang tigil. Patapos na ang isang oras ng biglang mag brown-out sa kwarto, nagulat si Satanas at nagalit dahil sa nangyari, habang si Jesus naman ay kalmado lang na nakaupo. Ilang minuto pa ay nagbalik na uli ang kuryente kasabay din ng pag tunog ng final buzzer, hudyat na tapos na ang dwelo. Laking panlulumo ni Satanas dahil nawala ang lahat ng kanyang tinalang pangalan sa computer dahil sa brown-out, samantalang si Jesus naman ay dahan-dahang pinakita sa mga hurado ang mga naitalang pangalan. Hindi makapaniwala si Satanas sa nakita at pinaratangan si Jesus na nandaya, pero sinagot lang sya ng mga hurado na “ang kaibahan nyo talaga ni Hesus eh ikaw Satanas hindi ka nagsa-save si Jesus nagsa-save…”

Jesus Saves… nagsisimba ka man o hindi.